काठमाडौं, १७ जेठ । राष्ट्रिय प्रजातन्त्र पार्टी -राप्रपा) का नेता धवलशमशेर राणाले नयाँ राष्ट्रवादी अभियानको घोषणा गरेका छन् ।
आइतबार काठमाडौंमा राप्रपाका असन्तुष्ट नेताहरूबीच भएको छलफलपछि जारी विज्ञप्तिमार्फत उनले देशमा विश्वसनीय राष्ट्रवादी शक्ति निर्माणका लागि नयाँ बाटो तय गर्ने निर्णय भएको बताएका हुन् ।
राणाले राप्रपालाई विगत चार वर्ष जनभावनाअनुकूल ढंगले अघि बढाउने प्रयास भए पनि पार्टीभित्रको वैचारिक द्विविधा र विरोधाभासका कारण त्यो सफल हुन नसकेको स्वीकार गरेका छन् ।
उनले देशको समृद्धि चाहने राष्ट्रवादी शक्ति तथा युवा पुस्तालाई नयाँ अभियानमा सहभागी हुन आह्वान गरेका छन् ।
साथै, राप्रपामा रहने साथीहरूप्रति कुनै वैरभाव नरहेको उल्लेख गर्दै समान विचार भएका राष्ट्रवादी शक्तिलाई एकजुट भएर अघि बढ्न आग्रह गरेका छन् ।
