काठमाडौं, १७ जेठ । राष्ट्रिय सभाको बैठक आइतबार कार्यसूचीमा प्रवेश नगरी नै स्थगित भएको छ ।
बिहान ११ः१५ बजेका लागि तय गरिएको बैठक करिब एक घण्टा ढिलो गरी सुरु भएको थियो । बैठकमा शून्य समय सञ्चालन गरिएको थियो, जसमा केही सांसदहरूले आफ्ना धारणा राखेका थिए । त्यसपछि सभाध्यक्ष नारायण दाहालले विशेष समय नराखिएको जानकारी दिँदै २० मिनेटका लागि बैठक स्थगित गरेको हो ।
आजको बैठकमा प्रधानमन्त्री तथा गृहमन्त्री वालेन्द्र शाहले प्रतिनिधि सभाबाट सन्देशसहित प्राप्त ‘प्रतिनिधि सभा सदस्य निर्वाचन (पहिलो संशोधन) विधेयक, २०८३’ माथि दफावार छलफल गरियोस् भन्ने प्रस्ताव प्रस्तुत गर्ने कार्यसूची रहेको थियो ।
सोही बैठकबाट उक्त विधेयक पारित गर्ने कार्यक्रम पनि तय गरिएको थियो । यस्तै, प्रतिनिधि सभाबाट सन्देशसहित प्राप्त ‘मतदाता नामावली (पहिलो संशोधन) विधेयक, २०८३’ लाई समेत आजै पारित गर्ने कार्यसूची रहेको थियो ।
तर, विधेयकहरूमा दर्ता भएका संशोधन प्रस्तावका विषयमा दलहरूबीच सहमति जुट्न नसकेपछि बैठक कार्यसूचीमा प्रवेश नगरी स्थगित गरिएको जनाए । संसद् सचिवालयका अनुसार दुवै विधेयकमा तीन–तीन वटा संशोधन प्रस्ताव दर्ता भएका छन् । ती संशोधनका सम्बन्धमा सहमति खोज्न सरकार र विभिन्न दलका प्रतिनिधिबीच छलफल जारी छ ।
