जनकपुर, १७ जेष्ठ । मधेश प्रदेश सरकारको गृह, सञ्चार तथा कानुन मन्त्रालयले सार्वजनिक स्थानमा हुने ध्वनि प्रदूषण नियन्त्रण गर्न स्थानीय तहहरूलाई निर्देशन दिएको छ ।
गृह, सञ्चार तथा कानुन मन्त्री फकिरा महतोको अध्यक्षतामा ६ वैशाख २०८३ मा बसेको प्रदेश सुरक्षा समन्वय समिति तथा सरोकारवालाको बैठकले गरेका विभिन्न निर्णय कार्यान्वयनका लागि मन्त्रालयले परिपत्र जारी गरेको हो ।
मन्त्रालयका अनुसार बैठकको निर्णय नम्बर ६ बमोजिम सार्वजनिक स्थानमा डीजे लगायत ध्वनि प्रदूषण गर्ने उपकरण तथा साधनहरूलाई सुरक्षा निकायसँगको समन्वयमा नियन्त्रण गर्न सबै स्थानीय तहलाई अनुरोध गरिएको छ ।
मन्त्रालयले उक्त निर्णयको प्रभावकारी कार्यान्वयन गर्न तथा गराउन आग्रह गरेको छ । बैठकले मधेश भवनको सुरक्षा तथा सरसफाइ व्यवस्थापन, कर्मचारी आवास क्षेत्रमा रहेका अनाधिकृत व्यक्तिहरू हटाउने, गुठी जग्गा व्यवस्थापन, फुटपाथ तथा अनधिकृत संरचना हटाउने लगायतका विषयमा पनि विभिन्न निर्णय गरेको छ ।
त्यसैगरी जनकपुर परिक्रमा क्षेत्रभित्र मदिरा बिक्री–वितरण तथा सेवन नियन्त्रणका लागि सम्बन्धित निकायसँग समन्वय गरी आवश्यक विवरण संकलन गर्ने निर्णय समेत गरिएको मन्त्रालयले जनाएको छ ।
