काठमाडौं, १७ जेठ । अध्यागमन विभागले वैदेशिक रोजगारीमा जाने नेपाली श्रमिकलाई श्रम स्वीकृति प्राप्त भएपछि मात्र त्रिभुवन अन्तर्राष्ट्रिय विमानस्थलमा यात्रा गर्न आउन आग्रह गरेको छ ।
विभागका अनुसार कतिपय श्रमिकले वैदेशिक रोजगार विभागमा श्रम स्वीकृतिका लागि आवेदन दिएपछि मात्रै प्रक्रिया पूरा भएको ठानेर विमानस्थल पुग्ने गरेका छन् ।
तर श्रम स्वीकृति जारी नभएसम्म अध्यागमनबाट प्रस्थान अनुमति नदिइने भएकाले उनीहरू समस्यामा पर्ने गरेका छन् । अध्यागमनले श्रमिक भिसामा विदेश जाने सबै नेपालीलाई आफ्नो श्रम स्वीकृति जारी भएको यकिन गरेर मात्र यात्रा गर्न अनुरोध गरेको छ ।
