काठमाडौं, ११ वैशाखं । थापाथलीस्थित बागमती किनारमा बसोबास गर्दै आएका सुकुमवासीहरू आफ्नो बसोबास स्थल खाली गर्न थालेका छन् ।
सरकारले बस्ती हटाउने तयारी गरेपछि उनीहरूले शुक्रबार बिहानदेखि सामान सार्न थालेको हो । यसैबीच, केही युवाहरू भने भेला भई सरकारविरुद्ध प्रदर्शनमा उत्रिएका छन् । प्रहरीले बिहीबार साँझ नै बस्ती खाली गर्न माइकिङ गरेको थियो ।
त्यसअघि बुधबार गृहमन्त्री पदबाट सुदन गुरुङले राजीनामा दिएपछि प्रधानमन्त्री बालेन शाहले सुरक्षा निकायका प्रमुखहरूसँग छलफल गरी बस्ती हटाउने निर्देशन दिएका थिए ।
प्रधानमन्त्रीको निर्देशनपछि काठमाडौंका प्रमुख जिल्ला अधिकारी ईश्वरराज पौडेलको अध्यक्षतामा बसेको जिल्ला सुरक्षा समितिको बैठकले बस्ती खाली गराउने निर्णय गरेको थियो । उक्त बैठकमा काठमाडौं महानगरपालिकाकी कार्यवाहक मेयर सुनिता डंगोल तथा अन्य सुरक्षा अधिकारीहरू सहभागी थिए ।
यसै निर्णयका आधारमा प्रहरीले बिहीबार साँझ थापाथलीसहित काठमाडौंका चार स्थानमा रहेका सुकुमवासी बस्तीमा माइकिङ गरेको थियो । प्रशासनले पहिलो चरणमा उपत्यकाभित्रका चार बस्तीमा डोजर प्रयोग गर्ने योजना जनाए ।
