काठमाडौं, १२ कात्तिक । जलवायु परिवर्तनका कारण हिमाली क्षेत्रमा बढ्दो जोखिमलाई प्रमुख मुद्दा बनाउँदै नेपाल र भुटानले संयुक्त राष्ट्रसङ्घीय जलवायु सम्मेलन कोप–३१ मा संयुक्त प्रस्तुति दिने भएका छन्।
कृषि, वन तथा वातावरण मन्त्रालयले बिहीबार काठमाडौंमा आयोजना गरेको राष्ट्रिय जलवायु सम्मेलनमा मन्त्री गीता चौधरीले हिमाल संरक्षणको मुद्दा दुवै देशले संयुक्त रूपमा उठाउने जानकारी दिइन्। उनका अनुसार हिमालको संरक्षण नेपाल र भुटानका लागि मात्रै नभई तल्लो तटीय क्षेत्रमा बसोबास गर्ने अर्बौँ मानिसको जीवनसँग पनि जोडिएको छ।
नेपालमा हालै बाढीका घटना भएका छन् भने भुटानमा करिब ७०० हिमनदी तथा हिमताल तीव्र गतिमा पग्लिरहेको र १७ वटा जोखिमपूर्ण अवस्थामा रहेको जनाइएको छ।
कोप–३१ को तयारीका लागि आयोजित सम्मेलनमा सांसद, विज्ञ तथा सरोकारवालाबाट प्राप्त सुझावलाई अध्ययन गरी अन्तर्राष्ट्रिय सम्मेलनमा प्रस्तुत गर्ने सरकारको योजना छ। कोप–३१ आगामी नोभेम्बर ९ देखि २० (कात्तिक २३ देखि मंसिर ४) सम्म टर्कीमा आयोजना हुँदैछ।
