काठमाडौं, ८ वैशाख । सरकारले मंगलबार बसेको मन्त्रिपरिषद् बैठकका प्रमुख निर्णयहरू सार्वजनिक गरेका छन् ।
प्रधानमन्त्री तथा मन्त्रिपरिषद् कार्यालयमा सम्पन्न बैठकपछि सञ्चार, सूचना तथा प्रविधिमन्त्री विक्रम तिमिल्सिनाले निर्णयहरू सार्वजनिक गरेको हो ।
उनका अनुसार विभिन्न कानुन संशोधनका प्रस्तावलाई अगाडि बढाउनेदेखि लिएर महत्वपूर्ण नियुक्ति तथा समिति गठनसम्बन्धी निर्णय गरिएको छ ।
मन्त्रिपरिषद्का मुख्य निर्णयहरू यस्ता छन्न :
– नेपाल धितोपत्र बोर्डको अध्यक्ष नियुक्तिका लागि राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा सिफारिस समिति गठन गर्ने। समितिमा अर्थ सचिव घनश्याम उपाध्याय र भूवन कुमार दाहाल सदस्य रहनेछन्।
– नेपाल विशेष सेवा ऐन, २०४२ संशोधनसम्बन्धी विधेयक संघीय संसद्मा पेश गर्न स्वीकृति दिने।
– प्रतिनिधिसभा सदस्य निर्वाचन ऐन, २०७४ संशोधन गर्न बनेको विधेयक संसद्मा पेश गर्न अनुमति दिने।
– मतदाता नामावली ऐन, २०७३ संशोधनसम्बन्धी विधेयक संसद्मा पेश गर्न स्वीकृति प्रदान गर्ने।
– समस्याग्रस्त सहकारी व्यवस्थापन समितिको अध्यक्षमा डिल्लिराज आचार्यलाई नियुक्त गर्ने तथा सदस्यहरूमा नवराज सिम्खडा र रोशनबहादुर शाक्यलाई मनोनयन गर्ने।
