काठमाडौं, १ बैशाख । पछिल्लो दुई वर्षमा श्रम, रोजगार तथा सामाजिक सुरक्षा मन्त्रालयमा मन्त्री फेरिएसँगै सुधारका नाममा पटक–पटक कार्यदल गठन हुने तर कार्यान्वयन नहुने प्रवृत्ति दोहोरिएको छ ।
विभिन्न मन्त्रीहरूले वैदेशिक रोजगार र श्रम सुधारका लागि नयाँ–नयाँ कार्यदल बनाए पनि तिनका प्रतिवेदन लागू नभएको देखिएका छन् । यसले क्षेत्रगत सुधारको गति अवरुद्ध भएको विज्ञहरूले जनाए ।
यस अवधिमा मन्त्रीहरूले आ–आफ्नै अध्ययन समिति गठन गर्दै सुझाव संकलन गरे पनि पुराना प्रतिवेदन कार्यान्वयन नगरी नयाँ अध्ययन गर्ने प्रवृत्ति देखिएको छ । यसलाई विज्ञहरूले समय दुरुपयोग भनेका छन् ।
श्रम विज्ञहरूका अनुसार अब नयाँ कार्यदलभन्दा पुराना प्रतिवेदन कार्यान्वयन र राजनीतिक इच्छाशक्तिमा जोड दिनु आवश्यक छ । उनीहरूले वैदेशिक रोजगार क्षेत्रका प्रमुख समस्या समाधानका लागि ठोस कार्यान्वयन नै मुख्य चुनौती भएको बताएका छन् ।
