काठमाडौं, २९ फागुन । राष्ट्रिय मानव अधिकार आयोगले ग्याससहित पेट्रोलियम पदार्थको आपूर्ति सहज बनाउन सरकारलाई निर्देशन दिएको छ ।
आयोगका सहायक प्रवक्ता श्यामबाबु काफ्लेले जारी गरेको विज्ञप्तिमा मध्यपूर्वको तनावपछि काठमाडौं उपत्यकामा एलपीजी ग्यास अभावबारे आएका समाचारप्रति आयोगको ध्यानाकर्षण भएको उल्लेख गरिएको छ ।
आयोगले नेपाल आयल निगम, वाणिज्य विभाग र नेपाल खाद्य व्यवस्था कम्पनी लिमिटेड लगायत ग्यास डिपोहरूको अनुगमन गर्दा पेट्रोलियम पदार्थको आयात नियमित रहे पनि ढुवानी व्यवस्थापन र अफवाहका कारण उपभोक्ताले अत्यधिक भण्डारण गर्ने तथा केही व्यवसायीले कृत्रिम अभाव सिर्जना गर्ने प्रवृत्ति देखिएको जनाएको छ ।
आयोगले आपूर्ति सहज बनाउन, कृत्रिम अभाव सिर्जना गर्नेहरूलाई कानुनी कारबाही गर्न तथा उपभोक्ताको अधिकार संरक्षण गर्न सरकारलाई आवश्यक कदम चाल्न निर्देशन दिएको छ ।
