काठमाडौं, २८ फागुन। निर्वाचन आयोगले प्रतिनिधि सभा सदस्य निर्वाचनमा सहभागी उम्मेदवार र राजनीतिक दललाई निर्वाचन प्रचार–प्रसारमा भएको आम्दानी तथा खर्चको विवरण निर्धारित समयभित्र सार्वजनिक गर्न आग्रह गरेको छ।
आयोगका अनुसार फागुन २१ मा सम्पन्न निर्वाचनअन्तर्गत पहिलो हुने निर्वाचित हुने प्रणालीतर्फका उम्मेदवारले आफ्नो आम्दानी र खर्चको विवरण सम्बन्धित जिल्ला निर्वाचन कार्यालयमा बुझाउनुपर्नेछ।
समानुपातिक प्रणालीतर्फ भने राजनीतिक दलहरूले सो विवरण आयोगसमक्ष तोकिएको ढाँचामा पेश गर्नुपर्ने प्रावधान छ।
प्रतिनिधि सभा सदस्य निर्वाचन ऐन, २०७४ तथा निर्वाचन (कसूर तथा सजाय) ऐन, २०७३ अनुसार निर्वाचन परिणाम घोषणा भएको मितिले ३५ दिनभित्र उक्त विवरण सार्वजनिक गरी सम्बन्धित निकायमा बुझाउनुपर्ने व्यवस्था रहेको आयोगले जनाएको छ।
आयोगले आम्दानी तथा खर्च सार्वजनिक गरेको प्रमाण (फोटो, स्क्रिनसट वा अन्य प्रमाण) सहित ३५ दिनभित्र जानकारी गराउन उम्मेदवार र दलहरूलाई अनुरोध गरेको छ।
