काठमाडौं, २७ फागुन । हाल नेपालमा पश्चिमी वायु, उपल्लो वायुमण्डलको उच्च चापीय प्रणाली तथा पूर्वी क्षेत्रनजिक रहेको न्यून चापीय क्षेत्रको आंशिक प्रभाव देखिएको छ ।
मौसम पूर्वानुमान महाशाखाका अनुसार बुधबार बिहान कोसी प्रदेशमा सामान्य बदली र अन्य स्थानमा आंशिक बदली रहेको छ ।
दिउँसो कोसी, मधेस, बागमती र गण्डकी प्रदेशसहित पहाडी क्षेत्रमा सामान्य बदली रहनेछ भने केही स्थानमा मेघगर्जन–चट्याङसहित हल्का वर्षा वा हिमपातको सम्भावना छ ।
तराई तथा उपत्यकाका केही स्थानमा तुवाँलो पनि देखिन सक्ने जनाइएको छ । मौसमविद् सरोज पुडासैनीका अनुसार काठमाडौँ उपत्यकामा पनि आज छिटपुट हल्का वर्षा हुन सक्ने सम्भावना छ भने दिनभर मौसम आंशिकदेखि सामान्य बदली रहनेछ ।
राति पनि धेरै प्रदेशका पहाडी क्षेत्रमा बदली रही केही स्थानमा हल्का वर्षाको सम्भावना रहेको छ ।
