काठमाडौं, २६ फाल्गुन । जवाफदेहिता निगरानी समितिले गत भदौ २३ र २४ मा भएको घटनासम्बन्धी गठन गरिएको जाँचबुझ आयोगको प्रतिवेदन तत्काल सार्वजनिक गर्न सरकारसँग माग गरेको छ ।
समितिका संयोजक राजुप्रसाद चापागाईं ले मंगलबार एक विज्ञप्ति जारी गर्दै आयोगले तयार पारेको समग्र प्रतिवेदन सार्वजनिक गरिनुपर्ने बताएका हुन् ।
समितिले प्रतिवेदन सार्वजनिक गरेर पीडित समुदाय, नागरिक समाज, सञ्चारमाध्यम तथा आम नागरिकलाई घटनाको वास्तविकता बारे जानकारी गराउन सरकारसँग आग्रह गरेको छ ।
जारी विज्ञप्तिमा भनिएको छ, “प्रतिवेदन सार्वजनिक गर्ने वा नगर्ने भन्ने विषय सरकारको तजबिजको कुरा होइन, बरु यसबारे जानकारी पाउने आम नागरिकको संविधानप्रदत्त अधिकार हो ।
समितिका अनुसार प्रतिवेदन सार्वजनिक भएमा घटनाबारे स्पष्टता आउने, जिम्मेवार पक्षको पहिचान गर्न सहज हुने र भविष्यमा यस्ता घटनाको पुनरावृत्ति रोक्न पनि सहयोग पुग्नेछ ।
जवाफदेहिता निगरानी समितिले सरकारलाई पारदर्शिता कायम गर्न र आयोगको प्रतिवेदन सार्वजनिक गरेर लोकतान्त्रिक मूल्य–मान्यतालाई सम्मान गर्न समेत आग्रह गरेको छ ।
