काठमाडौँ, २६ फाल्गुन । मौसमी प्रतिकूलताका कारण पछिल्ला दिनमा देशका विभिन्न स्थानमा वायु प्रदूषणको स्तर बढ्दै गएको छ।
विशेषगरी काठमाडौँ, पोखरा लगायतका ठूला सहर र तराई क्षेत्रमा सूक्ष्म कण ‘पीएम २.५’ को मात्रा उच्च भएको जनाइएको छ । वन तथा वातावरण मन्त्रालयअन्तर्गतको वातावरण विभागले प्रदूषणबाट जोगिन नागरिकलाई सावधानी अपनाउन आग्रह गरेको छ ।
विभागले बढी प्रदूषण भएको समयमा घरबाहिर निस्किँदा मास्क प्रयोग गर्न, सवारीसाधनको नियमित मर्मत गर्न तथा फोहोर र बालीनालीका अवशेष नजलाउन अनुरोध गरेको छ ।
त्यसैगरी वन–जङ्गलमा डढेलो नलगाउन, निर्माण कार्य गर्दा धुलो–धुवाँ नियन्त्रण गर्न र उद्योग–कलकारखानाले तोकिएका मापदण्ड पालना गर्न पनि विभागले आग्रह गरेको छ ।
चिसो मौसम, लामो समयदेखि वर्षा नहुनु र बिहान–बेलुका प्रदूषण फैलिन नसक्नु वायु प्रदूषण बढ्नुका मुख्य कारण रहेको विभागले जनाएको छ ।
