काठमाडौं, २६ फाल्गुन । प्रतिनिधिसभा सदस्य निर्वाचनको सुरक्षामा खटिएका निर्वाचन प्रहरीहरूलाई फागुन २८ गते सम्मानसहित बिदाइ गरिने भएको छ ।
निर्वाचन सुरक्षाका लागि नेपाल प्रहरीले १ लाख ३३ हजार ९८० र सशस्त्र प्रहरीले १५ हजार ११० गरी कुल १ लाख ४९ हजार ९० जना निर्वाचन प्रहरी ४० दिनका लागि परिचालन गरेका थिए भने निर्वाचन सम्पन्न भई मतगणना सकिएपछि उनीहरूको कार्यअवधि पूरा भएकाले धन्यवाद पत्रसहित बिदाइ गर्ने तयारी गरिएको प्रहरी अधिकारीहरूले बताएका छन् ।
निर्वाचन प्रहरीलाई ४० दिनको सेवाबापत ३४ हजार ७७६ रुपैयाँ तलब, रासन तथा आवतजावत खर्च र खाजा खर्च उपलब्ध गराइएको छ र निर्वाचन प्रहरी परिचालन र सेवा सुविधामा करिब ७ अर्ब ८३ करोड रुपैयाँ खर्च भएको सुरक्षा निकायले जनाएको छ ।
