काठमाडौं, २५ फागुन । नेकपा एमाले अध्यक्ष केपी शर्मा ओलीले संसदीय निर्वाचनमा दोस्रो पटक हार बेहोरे । पहिलो हार २०६४ सालमा खेपे ।
यसपालि दोस्रो हार खेप्दा उनी मतान्तरमा पनि निकै पछाडि परेका छन् । झापा–५ बाट राष्ट्रिय स्वतन्त्र पार्टी (रास्वपा) का बालेन्द्र शाह (बालेन) ६८ हजार ३ सय ४८ मत ल्याएर विजयी हुँदा ओलीले १८ हजार ७ सय ३४ मत पाए ।
जबकि, २०७९ निर्वाचनमा नेपाली कांग्रेसका खगेन्द्र अधिकारीलाई २८ हजार ८ सय ४२ मतान्तरले पराजित गर्दै ओली निर्वाचित भएका थिए । त्यसबेला ओलीले ५२ हजार २ सय ११ मत ल्याएका थिए । यसपालि ४९ हजार ६ सय २४ मतान्तरले ओली बालेनसँग पराजित भएको छ ।
योसँगै झापा–५ लाई आफ्नो क्षेत्र भन्दै आएका ओलीको बोली खण्डित भएको छ । ओलीले यसअघि झापा–५ बाट २०४८, २०५१ र २०५६ सालको चुनाव जितेका थिए । २०६४ सालको संविधानसभा सदस्यको निर्वाचनमा पराजित भए पनि त्यसयताका तीनवटै संसदीय चुनाव २०७०, २०७४ र २०७९ मा जितेका थियो ।
ओलीले चुनाव जितेका मात्र होइनन्, उनी संसदीय राजनीतिको शीर्ष स्थानमा रहँदै आएका नेता हुन् । २०५१ सालमा गृहमन्त्री भए । २०६३ मा उपप्रधानमन्त्री एवं परराष्ट्रमन्त्री बने । २०७२, २०७४ र २०८१ मा गरी चार पटक प्रधानमन्त्री भए । २३ र २४ भदौमा जेनजी आन्दोलन हुँदा प्रधानमन्त्री थिए । त्यसबेला राजीनामा दिन बाध्य भएका ओलीका लागि गत बिहीबारको चुनाव संसदीय राजनीतिका लागि बिराम लाग्ने दिन बन्यो ।
