जनकपुर, १६ फागुन। मैथिली साहित्य समाज जनकपुरद्वारा आयोजित मासिक कविगोष्ठीको १२औँ वार्षिकोत्सव समारोह भव्य रूपमा सम्पन्न भएको छ।
उक्त अवसरमा मधेश प्रदेश सभाका सभामुख रामअशिष यादव प्रमुख अतिथिका रूपमा उपस्थित थिए। समारोहलाई सम्बोधन गर्दै सभामुख यादवले मैथिली भाषा, साहित्य र संस्कृतिको संरक्षण तथा प्रवर्द्धन आजको आवश्यकता भएको बताए।
उनले साहित्य समाज परिवर्तनको सशक्त माध्यम भएको उल्लेख गर्दै कविता, कथा र विचारले सामाजिक चेतना जागृत गर्न महत्वपूर्ण भूमिका खेल्ने धारणा राखे। “भाषा र साहित्य जोगिएन भने पहिचान कमजोर हुन्छ,” उनले भने।
कार्यक्रममा मैथिली साहित्य समाजले विगत १२ वर्षदेखि निरन्तर रूपमा मासिक कविगोष्ठी आयोजना गर्दै आएको जानकारी दिइयो। हालसम्म समाजले १४५ वटा कविगोष्ठी सफलतापूर्वक सम्पन्न गरिसकेको छ, जुन मैथिली साहित्यको विकासका लागि उल्लेखनीय उपलब्धि मानिएको छ।
वार्षिकोत्सव समारोहमा विभिन्न कवि तथा साहित्यकारहरूले आफ्ना रचना वाचन गरेका थिए। कवितामार्फत समाज, संस्कृति, पहिचान र समसामयिक विषयहरू उठाइएका थिए।
सहभागीहरूले यस्तो कार्यक्रमले नयाँ पुस्तालाई मातृभाषाप्रति आकर्षित गर्ने विश्वास व्यक्त गरे।
कार्यक्रमको अन्त्यमा मैथिली साहित्य समाजका पदाधिकारीहरूले भाषा, साहित्य र सांस्कृतिक अभियानलाई अझ सशक्त बनाउँदै लैजाने प्रतिबद्धता व्यक्त गरेका थिए।
