काठमाडौं, २५ असोज । कोशी प्रदेश सरकारको आयोजनामा आगामी असोज २७ र २८ गते विराटनगरमा हुने अन्तरप्रदेश मुख्यमन्त्री सम्मेलन-२०८३ को तयारी पूरा भएको छ।
मुख्यमन्त्री तथा मन्त्रिपरिषद्को कार्यालयले पत्रकार सम्मेलनमार्फत सम्मेलनको सम्पूर्ण तयारी सकिएको जानकारी दिएको हो। सम्मेलनमा सातै प्रदेशका मुख्यमन्त्री, मुख्य न्यायाधिवक्ता, प्रदेश नीति तथा योजना आयोगका उपाध्यक्ष र प्रमुख सचिव सहभागी हुनेछन्।
संघीय शासन प्रणालीलाई प्रभावकारी बनाउने, प्रदेशबीच सहकार्य र समन्वय बढाउने तथा संविधानप्रदत्त अधिकारको कार्यान्वयनलाई सहज बनाउने विषयमा सम्मेलनमा छलफल हुनेछ।
त्यस्तै, वित्तीय संघीयता, कानुनी तथा नीतिगत सुधार, पूर्वाधार विकास, व्यापार सहजीकरण, प्राकृतिक स्रोतको उपयोग र विपद् व्यवस्थापनमा साझा रणनीति बनाउने विषयलाई प्राथमिकता दिइने कोशी प्रदेश सरकारले जनाएको छ।
