काठमाडौँ, १६ फागुन । निर्वाचन आयोगका आयुक्त सगुन शम्शेर राणाले प्रतिनिधिसभा निर्वाचनको मौन अवधिमा हुनसक्ने अवैध गतिविधि रोक्न विशेष निगरानी व्यवस्था गरिएको बताएका छन् ।
मौन अवधिलाई उम्मेदवारका लागि शान्त रहने र मतदाताका लागि स्वतन्त्र निर्णय गर्ने समय भएको उल्लेख गर्दै उनले आचारसंहिता उल्लङ्घन नगर्न आग्रह गरे ।
आयुक्त राणाका अनुसार निर्वाचन सुरक्षाका लागि देशभर करिब ३ लाख ४२ हजार सुरक्षाकर्मी परिचालन गरिएको छ भने मतपत्र ढुवानी, मतदान अधिकृतको तालिम र मतदान केन्द्रको तयारी अन्तिम चरणमा पुगेको छ ।
सामाजिक सञ्जाल र एआईको दुरुपयोग प्रमुख चुनौतीका रूपमा देखिएकाले त्यसको निगरानी कडा बनाइएको उनले बताए । आयोगले निर्वाचनलाई स्वच्छ, स्वतन्त्र, निष्पक्ष र भयरहित बनाउन सरकारसँग प्रभावकारी समन्वयमा काम गरिरहेको जनाएको छ ।
