जनकपुर, १६ फागुन । नेपाली कांग्रेसका प्रतिनिधिसभा सदस्य उम्मेदवार महेन्द्र यादवले धनुषा निर्वाचन क्षेत्र नं ४ मा आफ्नो चुनावी अभियानलाई तीव्र बनाएका छन् ।
उनी अहिले घरदैलो, मतदाता भेटघाट र साना–ठूला चुनावी सभामार्फत जनतासँग प्रत्यक्ष संवादमा सक्रिय देखिएका छन् । उम्मेदवार यादवले यस क्षेत्रको विकासका लागि अघिल्ला वर्षहरूमा थुप्रै काम भइसकेको उल्लेख गर्दै बाँकी रहेका विकास निर्माणका काम पूरा गर्न पुनः उम्मेदवार बनेको बताएका छन् ।
सडक, शिक्षा, स्वास्थ्य, खानेपानी र रोजगारीका सवाललाई प्राथमिकतामा राखेर आगामी कार्ययोजना अघि सार्ने उनको प्रतिबद्धता छ । स्थानीय मतदाताहरूले विकासको निरन्तरता, अनुभवी नेतृत्व र जनसमस्याप्रति संवेदनशीलतालाई आधार मानेर यादवप्रति विश्वास व्यक्त गर्न थालेका छन् ।
पछिल्ला दिनहरूमा यादवको पक्षमा जनसमर्थन बढ्दै गएको र चुनावी माहोल उत्साहजनक बन्दै गएको स्थानीयहरुले बताएका छन ।
क्षेत्रमा कांग्रेसको संगठन सुदृढ बनाउँदै मतदाताको विश्वास जित्ने प्रयासमा रहेका यादव आगामी निर्वाचनमा जित सुनिश्चित गर्न सक्रिय रूपमा अभियानमा जुटिरहेका छन् ।
