रौतहट, १४ फागुन । रौतहट निर्वाचन क्षेत्र नम्बर १ मा जनता समाजवादी पार्टी नेपालका प्रतिनिधिसभा सदस्य पदका उम्मेदवार योगेन्द्र राय यादव पछिल्लो समय निकै चर्चामा छन् ।
चुनाव नजिकिँदै जाँदा उनले मतदाता भेटघाट तथा घरदैलो अभियानलाई तीव्र बनाएका छन्, जसका कारण क्षेत्रमा चुनावी सरगर्मी थप बढेको छ ।
स्थानीय बस्ती, टोल र गाउँ–गाउँ पुगेर यादवले मतदातासँग प्रत्यक्ष संवाद गरिरहेका छन् । भेटघाटका क्रममा उनले क्षेत्रका विकास, रोजगारी, शिक्षा, स्वास्थ्य र किसानका समस्यालाई प्राथमिकतामा राखेर आफूले अघिल्ला जिम्मेवारीमा रहँदा गरेका कामबारे जानकारी गराउँदै आएका छन् ।
यादव मधेश प्रदेश सरकारका पूर्व मन्त्रीसमेत भइसकेका अनुभवी नेता हुन् । मन्त्रीका रूपमा रहँदा उनले मधेशका मुद्दा, अधिकार र विकासका सवालमा उल्लेखनीय भूमिका खेलेको दाबी गर्दै आएका छन् ।
यही अनुभवका आधारमा आफू निर्वाचित भए रौतहट–१ को समग्र विकासका लागि संघीय संसदमा सशक्त आवाज उठाउने प्रतिबद्धता उनले व्यक्त गरेका छन् ।
स्थानीय मतदाताहरूले समेत यादवको सक्रियता र अनुभवलाई सकारात्मक रूपमा लिँदै समर्थन जनाइरहेको देखिन्छ । चुनाव नजिकिँदै जाँदा रौतहट–१ मा जनता समाजवादी पार्टी नेपालको गतिविधि थप प्रभावकारी बन्दै गएको छ ।
