काठमाडौं, १४ फागुन । निर्वाचन आयोगले निर्वाचन अवधिभर मादक पदार्थ बिक्री–वितरण तथा सेवनमा प्रतिबन्ध लगाएको छ ।
उच्चस्तरीय निर्वाचन सुरक्षा समितिको निर्णयअनुसार मतदानको मितिभन्दा सात दिन अगाडिदेखि निर्वाचनको अन्तिम परिणाम घोषणा नभएसम्म यो प्रतिबन्ध लागू हुनेछ ।
यही फागुन २१ गते बिहान ७ बजेदेखि मतदान सुरु हुनेछ भने फागुन १८ गते राति १२ बजेदेखि निर्वाचन प्रचारप्रसार निषेध हुनेछ । मतदानको दिन अत्यावश्यक सेवाबाहेक सबै सार्वजनिक तथा निजी सवारीसाधन सञ्चालनमा रोक लाग्नेछ ।
निर्वाचनलाई स्वच्छ, भयरहित र विश्वसनीय वातावरणमा सम्पन्न गर्न सुरक्षा निकायलाई कडाइका साथ निर्देशन दिइएको आयोगले जनाएको छ ।
