रौतहट, १४ फागुन । रौतहट निर्वाचन क्षेत्र नम्बर ४ बाट जनता समाजवादी पार्टी (जसपा) का प्रतिनिधिसभा सदस्य उम्मेदवार राजकुमार दास तत्मा यतिबेला मतदाता भेटघाट तथा घरदैलो कार्यक्रममा सक्रिय देखिएका छन् ।
निर्वाचनको मिति नजिकिँदै जाँदा दासले टोल–टोल र गाउँ–गाउँ पुगेर मतदातासँग प्रत्यक्ष संवाद गर्दै आफ्ना एजेन्डा प्रस्तुत गरिरहेका छन् ।
दलित समुदायबाट आएका दास रौतहटमा एक परिचित तथा चर्चित व्यक्तित्वका रूपमा चिनिन्छन् । सामाजिक न्याय, समावेशिता, शिक्षा, स्वास्थ्य र रोजगारीका विषयलाई मुख्य प्राथमिकतामा राख्दै उनी मतदातासामु जनमुखी प्रतिबद्धता व्यक्त गरिरहेका छन् ।
स्थानीय समस्यालाई संघीय संसदमार्फत सम्बोधन गर्ने उनको भनाइ छ । जनता समाजवादी पार्टीको चुनावी चिन्ह छाता लिएर मैदानमा उत्रिएका दासले दलित, पिछडिएका वर्ग तथा सबै समुदायको साझा प्रतिनिधि भएर काम गर्ने प्रतिवद्धता जनाएका छन् ।
घरदैलोका क्रममा स्थानीयवासीले देखाएको उत्साह र समर्थनले आफूलाई थप ऊर्जा मिलेको उनले बताएका छन् ।
