एजेन्सी, १ मंसिर । बंगलादेशकी पूर्व प्रधानमन्त्री शेख हसिनालाई मानवताविरुद्धका अपराधसम्बन्धी मुद्दामा दोषी ठहर गरिएको दाबी समाचारहरूमा उल्लेख गरिएको छ ।
रोयटर्सलाई उद्धृत गर्दै आएका रिपोर्टअनुसार, देशको एक अदालतले सोमबार हसिनालाई मानवअधिकार उल्लंघनसम्बन्धी आरोपहरूमा सजाय सुनाएको बताइएको हो । गत वर्ष विद्यार्थी नेतृत्वमा भएको आन्दोलनलाई उनले दमन गर्न निर्देशन दिएको आरोपमा महिनौँदेखि चलिरहेको मुद्दाको फैसला हालै सुनाइएको हो ।
इन्टरनेसनल क्राइम ट्रिब्यूनलले हसिनामाथि लगाइएका पाँचवटा आरोपमाथि सुनुवाइ गर्दै हत्या, अपराध रोक्न असफलता र मानवताविरुद्धका अन्य गम्भीर आरोपमा दोषसिद्धि सुनाएको विवरण सार्वजनिक गरिएको छ । फैसलापछि देशभर तनाव र हिंसात्मक गतिविधि बढेको रिपोर्ट छ ।
सरकारले उच्च सतर्कता घोषणा गर्दै ढाकामा १५,००० प्रहरी परिचालन गरेको र प्रदर्शनकारीसँग कठोर रूपमा व्यवहार गर्न निर्देशन दिएको उल्लेख छ । स्थानीय मिडियाका अनुसार हालै दुई बसमा आगजनीका घटना पनि देखिएका छन् ।
फैसला आउनुअघि नै शेख हसिनाले आफूमाथिका सबै आरोपहरू राजनीतिक उद्देश्यले बनाइएका झूटो दाबी गर्दै अन्तरिम सरकारमाथि आफ्नो पार्टी अवामी लीगलाई कमजोर बनाउने प्रयास गरेको आरोप लगाएकी थिइन् ।
समर्थकहरूलाई पठाएको अडियो सन्देशमा उनले अवामी लीग देशको मूलभूत तहबाट उठेको पार्टी भएको बताउँदै बाहिरी शक्तिले सजिलै समाप्त गर्न नसक्ने धारणा व्यक्त गरेकी थिइन् । हसिनाले विरोध प्रदर्शनहरूमा उनका समर्थकहरूले स्वस्फूर्त प्रतिक्रिया जनाइरहेको दाबी गर्दै अन्तरिम सरकार र मुहम्मद युनुसमाथि कठोर आरोप लगाएकी छन् ।
