रुपन्देही, २९ कार्तिक । जनता समाजवादी पार्टी (जसपा) अध्यक्ष उपेन्द्र यादवले भैरहवामा आयोजित लुम्बिनी प्रदेश समितिको प्रथम अधिवेशनमा सरकारले अनिवार्य रूपमा निर्वाचनको वातावरण तयार गर्नुपर्ने बताएका छन् ।
सुरक्षाको अवस्थाबारे जनचिन्ता गएको भन्दै उनले प्रहरी प्रशासनलाई भयमुक्त बनाएर निर्वाचनी माहोल बनाउनु सरकारको दायित्व भएको उल्लेख गरे ।
यादवले जनसङ्ख्याको आधारमा प्रतिनिधित्व सुनिश्चित गर्ने, पैसामुक्त निर्वाचन प्रणाली बनाउन सुधार आवश्यक पर्ने तथा प्रदेश सरकारलाई अधिकारसम्पन्न बनाउँदै संघीय संरचना सुदृढ गर्नुपर्ने धारणा राखे ।
जसपा महासचिव रामकुमार शर्माले उत्पीडित समुदायका अधिकार सुरक्षित गर्दै संविधान संशोधनमार्फत देशलाई अगाडि बढाउनुपर्ने बताउँदै समर्थन जनाए ।
