काठमाडौं, २६ भदौ । नेपाली सेनासहितका सुरक्षा निकायले व्यापक कारबाही गर्दै विभिन्न स्थानबाट ९४ थान हतियार बरामद गरेका छन् ।
सेनाले कारागारबाट भागेका कैदी नियन्त्रण, हतियार संकलन र शङ्कास्पद वस्तु सुरक्षित रुपमा नष्ट गर्ने कार्य सम्पन्न गरेको बताए । सप्तरीको राजविराजस्थित जिल्ला कारागारबाट भाग्ने प्रयासमा रहेका १९२ जना कैदीलाई सेनाले नियन्त्रणमा लिएको छ ।
त्यस्तै कञ्चनपुरको चाँदनीबाट भारततर्फ भाग्न खोजेका सात कैदीलाई भारतीय सीमा सुरक्षा बलले नियन्त्रणमा लिएर नेपाललाई बुझाएको छ । स्थानीयको सहयोगमा एकजना कैदी पक्राउ परेका छन् भने १२ जना स्वेच्छाले कारागार फर्किएका छन् ।
रामेछाप जिल्ला कारागारमा भएको झडप नियन्त्रणका क्रममा सेनाले चलाएको गोली लागी २ जना कैदीको मृत्यु भएको छ र १२ जना घाइते भएका छन् ।
यसैबीच, काभ्रे बनेपा नगरपालिका–९ नयाँ बस्तीमा भेटिएको शङ्कास्पद वस्तु सेनाले सुरक्षित तरिकाले नष्ट गरेको छ ।
