जनकपुर, २४ वैशाख । मधेशका मुख्यमन्त्री कृष्ण प्रसाद यादवले निजी सचिवालयमा १० जना नियुक्त गरेपछि उनीहरूको तलबभत्ता रोकिएको छ ।
मुख्यमन्त्री बनेपछि यादवले स्वकीय सचिव, कम्प्युटर अपरेटर, चालक र कार्यालय सहयोगीसहित १० जना नियुक्त गरेका थिए ।
यद्यपि, संघीय सरकारले खर्च कटौतीअन्तर्गत प्रदेश सरकारका मन्त्री तथा मुख्यमन्त्रीको सचिवालयमा बढीमा तीन जना मात्रै नियुक्त गर्न पाइने परिपत्र जारी गरेकाले लेखाशाखाका कर्मचारीले तलब निकासा गर्न अस्वीकार गरेका छन् ।
कर्मचारीहरूले परिपत्रविपरीत तलब खुवाए भविष्यमा जिम्मेवार बन्नुपर्ने डर रहेको बताएका छन् । मुख्यमन्त्री यादवले भने आफ्ना सचिवालयका कर्मचारीले अहिलेसम्म तलबभत्ता नपाएको गुनासो सार्वजनिक रूपमा गर्दै आएका छन् ।
