काठमाडौं, २५ भदौं । जेनजी आन्दोलनका क्रममा कुटिएका नेपाली कांग्रेसका सभापति शेरबहादुर देउवा र पत्नी डा. आरजु राणाको हाल एक अस्पतालमा उपचाररत छन् ।
उनीहरुको स्वास्थ्यस्थिति खतरामुक्त रहेको स्वकीय सचिव भानु देउवाले जानकारी दिए । मंगलबारको प्रदर्शन तथा आगजनीका क्रममा बूढानीलकण्ठस्थित देउवाको घर जलाइएको थियो ।
घरभित्रै रहेका देउवा दम्पतिमाथि आन्दोलनकारीले कुटपिट गरेका थिए भने नेपाली सेनाले उनीहरुको उद्वार गरेको थियो । देउवा दम्पतिलाई हेलिकोप्टरबाट अस्पताल लैजाने प्रयासमा आन्दोलनकारीले लामो समय अवरोध गरेका थिए ।
सेनाले बल्लतल्ल मंगलबार बेलुकी काठमाडौंस्थित एक अस्पतालमा उनीहरुलाई पुर्यायो । उपचारमा संलग्न चिकित्सकका अनुसार दुबैको टाउकोको पछाडिको भागमा फुटेको बताइएको छ ।
स्वकीय सचिव देउवाका अनुसार अस्पताल लैजानासाथ एमआरआई सहित सबै किसिमको स्वास्थ्य परीक्षण भएको थियो । बेलुकी नै दुबैको रक्तश्राव बन्द भइसकेको छ ।
एमआरआई रिपोर्टमा टाउकोमा गहिरो चोट नदेखिएका कारण चिकित्सकले खतरामुक्त रहेको बताएको उनले जानकारी दिए । सुरक्षाका कारण अस्पतालको नाम खोलिएको छैन ।
