सुर्खेत, ११ साउन । सुर्खेतको वीरेन्द्रनगर नगरपालिका–१३ करेखोलामा एकजना पूर्वसैनिकले आफ्नै श्रीमतीको हत्या गरेका छन् ।
शनिबार मध्यराति करिब १ बजेतिर ४२ वर्षीय दानसिंह ठाडाले आफ्नी ४१ वर्षीया श्रीमती रविना ठाडाको हत्या गरेका हुन् । हत्या गरेपछि उनले आफैँले प्रहरीलाई फोन गरी ’मैले श्रीमती मारेँ, आउनुस्’ भनेर घटनाको जानकारी गराएको प्रहरी बताउँछ ।
प्रहरी स्रोतका अनुसार, दानसिंहले प्रहरीलाई फोन गर्दा आफ्नो ठेगाना पनि दिएका थिए। वीरेन्द्रनगर–१३ का वडाध्यक्ष दीपेन्द्रराज कोइरालाका अनुसार, उनले प्रहरीलाई फोन गर्नु अघि आफूसँग पनि सम्पर्क गरी फोन नम्बर मागेका थिए।
“राति मसँग नम्बर मागेका थिए, पछि थाहा भयो घरमा घटना भइसकेको रहेछ,” कोइरालाले भने । दानसिंह नेपाली सेनाबाट केही वर्षअघि मात्र अवकाश पाएका थिए ।
उनका अनुसार, ठाडाले सुतेकै अवस्थामा दाउराले हानेर श्रीमतीको हत्या गरेका हुन् भन्ने प्रारम्भिक अनुमान गरिएको छ । घटनाको जानकारी पाउनासाथ प्रहरी चौकी करेखोलाबाट खटिएको टोलीले ठाडालाई बिहान २ बजेतिर नियन्त्रणमा लिएको थियो ।
मृतकको शव पोस्टमार्टमका लागि प्रदेश अस्पताल कालागाउँमा लगिएको छ । ठाडाको परिवारमा श्रीमान–श्रीमती मात्रै बस्दै आएका थिए ।
उनका तीन छोरीमध्ये एकजना जापानमा छन् भने दुई छोरीको विवाह भइसकेको छ । उनका छोरा भने दुबईमा बस्दै आएका छन् । हत्या किन र कसरी भयो भन्नेबारे अनुसन्धान सुरु भएको प्रहरीले जनाएको छ ।
