सिरहा , १० साउन । झग्डा छुट्टाउन गएका एकजनाको खुकुरी प्रहार गरी सिरहामा हत्या भएको छ ।
जिल्लाको गोलबजार नगरपालिका–३ का ३५ वर्षीय मोतीराम सदाको हत्या भएको छ । सिरहाका प्रहरी प्रवक्ता डिएसपी विरेन्द्रकुमार पासवानका अनुसार मोतीरामलाई आफ्नै भाई २५ वर्षीय श्याम सदाले खुकुरी प्रहार गरी हत्या गरेको छ ।
डिएसपी पासवानले भने, बिहीबार राति ९ बजेतिर श्याम र उनकी श्रीमती कौशल्या सदाबीच घरायसी विवाद भइरहेको थियो । विवाद छुट्टाउन गएका मोतीराम सदालाई भाई श्यामले खुकुरी प्रहार गरेका थिए ।
खुकुरी प्रहारबाट गम्भीर घाइते भएका मोतीरामको प्रादेशिक अस्पताल लहानमा उपचारको क्रममा राति सवा ११ बजेतिर मृत्यु भएको डिएसपी पासवानले बताए ।
खुकुरी प्रहार गरी फरार भएका भाई श्यामलाई सिरहा प्रहरीले औरही गाउँपालिका स्थित सीमा क्षेत्रबाट शुक्रवार बिहान पक्राउ गरेको छ । घटनाबारे थप अनुसन्धान गरिरहेको जिल्ला प्रहरी कार्यालय सिरहाले जनाएको छ ।
