जनकपुर, ३० असार । मधेश प्रदेश सरकारका ऊर्जा, सिचाई तथा खानेपानी मन्त्री शेष नारायण यादवको विशेष पहलमा जनकपुरधाम उपमहानगरपालिका–२१, कुर्थास्थित वाटीका चौकदेखि तपनपुर सडक खण्डको निर्माण कार्य शुरू भएको छ ।
नेपाली कांग्रेसका सह–महामन्त्री एवम् पूर्व संघीय खानेपानी तथा सरसफाई मन्त्री महेन्द्र यादवको प्रमुख आतिथ्यमा सोमवार विहान आयोजित एक भव्य कार्यक्रमका बीच सो सडक खण्डको शिलान्यास गरिएको छ ।
प्रमुख अतिथि सहमहामन्त्री महेन्द्र यादव, विशिष्ट अतिथिद्वय ऊर्जा, सिचाई तथा खानेपानी मन्त्री शेष नारायण यादव र प्रदेश सभा सदस्य एवं प्रमुख सचेतक कुमरकान्त झाले संयुक्त रूपमा शिलान्यास गरेका हुन् । शिलान्याससंगै निर्माण कार्य पनि आजैदेखि शुरू गरिएको छ । 
मधेश प्रदेश सरकारको बहुवर्षिय योजना एक निर्वाचन क्षेत्र एक सडक कार्यक्रम (दोस्रो चरण) अन्तर्गत ५ किलोमीटर सडक निर्माणको क्रममा मन्त्री यादवको निर्वाचन क्षेत्र धनुषाको ४(१) मा सो सडक निर्माण हुन लागेको हो ।
सो अवसरमा बोल्दै प्रमुख अतिथि सह–महामन्त्री महेन्द्र यादवले भने स्थानीय पूर्वाधार विकासमा सडक विस्तारको भूमिका अत्यन्त महत्वपूर्ण रहेको उल्लेख गर्दै यस सडक निर्माणले जनकपुरधाम–२१ देखि महोतरीको तपनपुरसम्मका बासिन्दालाई आवागमन, व्यापार तथा सेवा पहुँचमा सहजता ल्याउने विश्वास व्यक्त गरे ।
सो सडक निर्माणको ठेक्का डेढ वर्षमा सम्पन्न गर्ने गरि महतो कन्स्ट्रक्सन एण्ड इन्जिनियरिंग कन्सलटेन्सीले १२ करोड २५ लाखमा पाएका हुन् ।
खुल्ला ठांउमा १० मीटर कालोपत्रे र सघन वस्तीमा २५ फिटसम्म पिपिसी ढलान गरिने ठेकेदार कम्पनी कन्सलटेन्सीका प्रतिनिधि ब्रजकिशोर यादवले जानकारी दिएका छन् ।
कार्यक्रममा विशेष अतिथि समेत रहेका ऊर्जा, सिंचाई तथा खानेपानी मन्त्री शेष नारायण यादवले विकासको काममा प्रदेश सरकारले हरेक तत्पर रहेको बताए ।
उनले भने देशमा संघियतापछि प्रदेश सरकारको निर्माणले मधेशमा विकासको लहर नै आएछ, यही अवस्था विद्यमान रहे प्रदेशमा समृद्धि संगै आर्थिक विकासले फड्को मार्नेछ । 
सो कार्यक्रममा जनकपुरधाम उपमहानगरपालिका वडा नं. २१ का वडा अध्यक्ष राजु साह, कांग्रेसका युवा नेता घनश्याम यादवसहित कांग्रेसका स्थानीय नेताहरू, सामाजिक अगुवाहरू, युवाहरू, महिलाहरू तथा सर्वसाधारणको उल्लेखनीय उपस्थिति रहेको थियो ।
