जनकपुर, २९ असार। धनुषा जिल्लाको जनकपुर उपमहानगरपालिका–२४ की २० वर्षीया रोशनी खातुन सामाजिक सञ्जाल TikTok को ‘लाइभ’ मार्फत अभद्र भाषा र गालीगलौज गरेको अभियोगमा पक्राउ परेकी छिन्।
जिल्ला प्रहरी कार्यालय धनुषाबाट खटिएको प्रहरी टोलीले असार २९ गते खातुनलाई नियन्त्रणमा लिएको हो।
प्रहरीका अनुसार उनले TikTok Live को माध्यमबाट सार्वजनिक रूपमा अश्लील शब्दहरू प्रयोग गर्दै गालीगलौज गरेकी थिइन्, जसले अन्य प्रयोगकर्तामा समेत नकारात्मक असर पारेको देखिएको छ।
प्रहरीले खातुनविरुद्ध ‘अभद्र व्यवहार’ सम्बन्धी मुद्दा दर्ता गरी आवश्यक अनुसन्धान अगाडि बढाएको जनाएको छ।
हाल उनलाई जिल्ला प्रहरी कार्यालय धनुषाको हिरासतमा राखिएको छ र म्याद थप प्रक्रिया पूरा गरेर थप अनुसन्धान भइरहेको प्रहरी स्रोतले जानकारी दिएको छ।
सामाजिक सञ्जालमा बढ्दो अश्लीलता र आपत्तिजनक व्यवहारबारे प्रहरी गम्भीर रहेको जनाइएको छ।
यस प्रकारका क्रियाकलापले समाजमा गलत सन्देश फैलाउने भएकोले यस्ता घटनामा संलग्न व्यक्तिहरूलाई कानूनी दायरामा ल्याउने प्रहरीको भनाइ छ।
