काठमाडौँ, २८ असार । जनता समाजवादी पार्टी नेपालका अध्यक्ष उपेन्द्र यादवले नेपालका सातै प्रदेश काम नलाग्ने र राज्य पुनःसंरचना पुनः गरिनुपर्ने माग राखेका छन् ।
दलित, पिछडावर्ग, थारू, आदिवासी र अल्पसंख्यक परिसंघ (डोटिम) ले शनिबार आयोजना गरेको राष्ट्रिय भेला एवं ‘समानता र समाजिक न्यायको अधिकार’ विषयक अन्तरक्रियामा उनले परिवर्तनका लागि एकता आवश्यक रहेको कुरामा पनि जोड दिए ।
परिसंघ स्थापनाको उद्देश्य नै सबैलाई एकताबद्ध गर्न भएकाले शोषण उत्पीडनमा परेकालाई एकताबद्ध गरी परिवर्तनका लागि संघर्ष गर्ने बताए । जनसंख्याका आधारमा प्रतिनिधित्व हुनुपर्ने र यही नै लोकतन्त्रको मुख्य मान्यता भएको उनले बताए ।
जबसम्म सबै उत्पीडित समुदाय एकताबद्ध हुँदैनन्, तबसम्म परिवर्तन हुँदैन,’ उनले भने, ‘यहाँ फुटाउ र राज गर नीतितहत राज्यले विभिन्न शक्तिलाई अलगअलग गरेर शासन गरिरहेको छ, अब अलग होइन, एकताको जरुरी छ ।
डोटिम सबै उत्पीडित समुदायका लागि साझा मञ्च रहेको बताएका उनले अल्पसंख्यकलाई झन् कमजोर बनाउने षड्यन्त्र भइरहेको आरोप लगाए ।
