काठमाडौँ, २९ असोज । नेपाली कांग्रेसकी नेतृ बासना थापाले जेनजी आन्दोलनपछि पार्टीको राजनीतिमा लगातार सफलता हासिल गरेकी छन् ।
प्रतिनिधिसभा सदस्यमा निर्वाचित भएकी थापा कांग्रेसको १५औँ महाधिवेशनमा महिला खुला केन्द्रीय सदस्यतर्फ सर्वाधिक मत प्राप्त गर्दै विजयी भएकी छन् ।
गत फागुनमा सम्पन्न प्रतिनिधिसभा निर्वाचनमा उनी दैलेख निर्वाचन क्षेत्र नम्बर १ बाट निर्वाचित भएकी थिइन् । निर्वाचन समितिका अनुसार थापाले पाँच हजार १९३ मत ल्याएकी छन् ।
थापा १३औँ महाधिवेशनमा कांग्रेसको महाधिवेशन प्रतिनिधि बनेकी थिइन् । १४औँ महाधिवेशनमा भने उनी पराजित भएकी थिइन् । लामो समयदेखि पार्टी संगठन निर्माण र युवालाई राजनीतिमा जोड्ने काममा सक्रिय रहँदै आएकी उनी अहिले कांग्रेस संसदीय दलकी प्रमुख सचेतकसमेत हुन् ।
थापाले कांग्रेसमा युवा तथा महिलाको प्रतिनिधित्व बढ्दै गएको बताउँदै पार्टीलाई थप समावेशी र एकताबद्ध बनाउनुपर्नेमा जोड दिएकी छन् । पार्टीको नीति तथा कार्यक्रममा परिवर्तन आवश्यक रहेको उनको धारणा छ ।
