काठमाडौं, २७ असोज । राष्ट्रिय स्वतन्त्र पार्टी (रास्वपा) ले सांसद खगेन्द्र सुनारलाई सार्वजनिक कार्यक्रममा सहभागी नहुन निर्देशन दिएको छ।
एक महिलालाई धम्की दिएको र ब्ल्याकमेल गरेको भनिएको अडियो सार्वजनिक भएपछि रास्वपाले सुनारमाथि आन्तरिक छानबिन अघि बढाएको हो।
पार्टीका महामन्त्री विपिन आचार्यले विज्ञप्ति जारी गर्दै केन्द्रीय अनुशासन आयोगलाई घटनाको सत्यतथ्य पत्ता लगाउन तत्काल छानबिन गर्न निर्देशन दिइएको जानकारी दिएका छन्।
छानबिन निष्कर्षमा नपुगेसम्म अनुसन्धान प्रभावित हुन नदिन र पदीय नैतिकता कायम राख्न सुनारलाई सांसदको हैसियतमा कुनै पनि औपचारिक कार्यक्रममा सहभागी नहुन निर्देशन दिइएको विज्ञप्तिमा उल्लेख छ।
