काठमाडौँ, १५ असोज । राष्ट्रिय प्रजातन्त्र पार्टी (राप्रपा)की प्रमुख सचेतक खुश्बु ओलीले सरकारको सुशासन र पारदर्शितामाथि प्रश्न उठाउँदै प्रधानमन्त्री कार्यालय अन्तर्गतको ‘सफ्टवेयर विकास तथा सञ्चालन केन्द्र’को कार्यकारी निर्देशक नियुक्तिबारे संसदीय छानबिन गर्न माग गरेकी छन्।
प्रतिनिधिसभाको बैठकमा बोल्दै ओलीले नियुक्तिका लागि कार्यविधि बनाउने कार्यदलका संयोजक किरण तिम्सिनाले आफू अनुकूल हुने गरी मापदण्ड तयार पारेको आरोप लगाइन्। सर्टलिस्ट, अन्तर्वार्ता र मन्त्रिपरिषद्को निर्णय प्रक्रियामा समेत हतार गरिएको तथा निर्णयसम्बन्धी सूचना लुकाइएको उनको दाबी थियो।
उनले उक्त विषयलाई सुशासनको मर्मविपरीत भएको भन्दै प्रधानमन्त्रीको ध्यानाकर्षण गराइन्। साथै गैरआवासीय नेपालीको नागरिकता निरन्तरताको विषयमा सरकारको स्पष्ट नीति आउनुपर्ने माग गर्दै सत्तापक्षका सांसदहरूलाई सामाजिक सञ्जालमा मात्र सक्रिय नभई संसद्मा जिम्मेवार भूमिका निर्वाह गर्न आग्रह गरिन्।
