जनकपुर, २९ भदौ । वृहत्तर जनकपुर क्षेत्र विकास परिषद्, जनकपुरको अध्यक्षमा नियुक्त भएका कौशल किशोर झाले आज पदभार ग्रहण गरेका छन् ।
परिषद्को सदस्यमा अजित मिश्रा पनि नियुक्त भएका छन् । पदभार ग्रहण गर्दै अध्यक्ष झाले वृहत्तर जनकपुर क्षेत्रको धार्मिक, सांस्कृतिक तथा पर्यटकीय महत्वलाई थप उजागर गर्दै विकासका गतिविधिलाई प्रभावकारी रूपमा अघि बढाउने प्रतिबद्धता व्यक्त गरेका छन् ।
उनले जनकपुरको ऐतिहासिक तथा धार्मिक पहिचानलाई संरक्षण गर्दै क्षेत्रको सौन्दर्यीकरण, पूर्वाधार विकास र पर्यटकीय प्रवद्र्धनमा विशेष ध्यान दिने बताए ।
परिषद्को उद्देश्यअनुसार काम गर्दै सरोकारवाला निकाय तथा स्थानीय समुदायसँग सहकार्य गरेर अघि बढ्ने उनको भनाइ थियो । अध्यक्ष झाले भने, ‘वृहत्तर जनकपुर क्षेत्रको धार्मिक तथा सांस्कृतिक महत्वलाई विश्वस्तरमा चिनाउन परिषद्ले प्रभावकारी भूमिका खेल्नुपर्छ ।
उपलब्ध स्रोत र साधनको उचित प्रयोग गर्दै जनकपुरको विकास र पर्यटन प्रवद्र्धनलाई प्राथमिकतामा राखेर काम गर्नेछु । उनले परिषद्लाई थप सक्रिय र परिणाममुखी बनाउन कर्मचारी, स्थानीय तह, धार्मिक संघसंस्था तथा सम्बन्धित सरोकारवालाबीच समन्वय आवश्यक रहेको बताए ।
नवनियुक्त सदस्य अजित मिश्राले पनि परिषद्को उद्देश्य पूरा गर्न अध्यक्ष तथा सम्बन्धित निकायसँग सहकार्य गर्दै अघि बढ्ने प्रतिबद्धता जनाएका छन् ।
