काठमाडौं, २१ भदौ। रसुवाको अपर त्रिशूली जलविद्युत् आयोजना-१ को सुरुङभित्रबाट दुई वटा शव फेला परेका छन्।
आयोजना प्रमुख कार्यकारी अधिकृत गिरिराज अधिकारीका अनुसार आइतबार सुरुङको भित्री भागमा शव भेटिएका हुन्। उनीहरूको पहिचान खुल्न बाँकी छ।
यसअघि शनिबार यही सुरुङबाट २२५ मिटरभित्र फसेका एक चिनियाँ नागरिकको जीवितै उद्धार गरिएको थियो।
भदौ १० गते आएको विनाशकारी भोटेकोशी बाढीपछि सुरुङमा अझै खोज तथा उद्धार कार्य जारी छ।
