काठमाडौं, २१ भदौ । पृथ्वी राजमार्गअन्तर्गत धादिङको कृष्णभीर खण्डमा पहिरोले सडक अवरुद्ध भए पनि वैकल्पिक मार्गबाट पछिल्लो तीन दिनमा काठमाडौं उपत्यकामा ८७ हजार ८७७ सिलिन्डर एलपी ग्यास भित्रिएको छ।
नेपाल आयल निगमका अनुसार १८ भदौमा २४ हजार ४९४, १९ गते ३४ हजार १३४ र २० गते २९ हजार २४९ सिलिन्डर काठमाडौं ल्याइएको हो। सडक अवरुद्ध हुँदा आपूर्ति प्रभावित नहोस् भनेर तराईका विभिन्न उद्योगमा ग्यास रिफिल गरी वैकल्पिक बाटोबाट उपत्यका पठाउने व्यवस्था गरिएको निगमले जनाएको छ।
कृष्णभीर सडक नियमित सञ्चालनमा नआएसम्म यही प्रक्रियाबाट ग्यास आपूर्ति जारी राखिने निगमले जनाएको छ।
