काठमाडौं, २१ भदौ । नेपाली कांग्रेसका सभापति गगन थापा र नेता डा. शेखर कोइरालाबीच आइतबार पार्टीभित्रको आन्तरिक विवाद समाधान र एकताका विषयमा छलफल भएको छ।
भेटमा कोइरालाले देश, लोकतन्त्र र राष्ट्रियता चुनौतीपूर्ण अवस्थामा रहेकाले कांग्रेस एकजुट हुनुपर्ने बताएका थिए। उनले पार्टी एकताका लागि आवश्यक त्याग गर्न आफू तयार रहेको धारणा राखेका छन्। सभापति थापाले पनि आफू पार्टी एकताको पक्षमा रहेको र त्यसका लागि पहल गरिरहेको बताए।
उनीहरूबीच रसुवा, नुवाकोट र धादिङमा बाढीबाट भएको क्षतिबारे समेत छलफल भएको थियो। थापाले शनिबार नेता पूर्णबहादुर खड्कासँग पनि पार्टी विवाद समाधानबारे छलफल गरेका थिए।
