काठमाडौं, २० भदौ । नेपाली कम्युनिस्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले सरकारको कार्यशैलीप्रति असन्तुष्टि जनाउँदै त्यसको लक्षण राम्रो नदेखिएको टिप्पणी गरेका छन्।
शनिबार काठमाडौँमा आयोजित कार्यक्रममा उनले सरकारको कार्यशैलीका कारण राजनीति, कर्मचारीतन्त्र र राज्यका निकायमा अन्योल देखिएको बताए। सरकारका सकारात्मक काममा सहयोग गर्ने तर गलत कामको आलोचना र विरोध गर्ने आफ्नो नीति यथावत् रहेको उनको भनाइ छ।
प्रचण्डले राजनीतिक नेतृत्व, कर्मचारीतन्त्र र नागरिक समाजलाई राष्ट्र तथा जनताप्रति जिम्मेवार बन्न आग्रह गर्दै लोकतन्त्र, स्वतन्त्रता, राष्ट्रिय स्वाधीनता र भौगोलिक अखण्डताको रक्षा गर्न सबै पक्ष एकजुट हुनुपर्नेमा जोड दिए।
