जनकपुर, २० भदौं । धनुषाको क्षीरेश्वरनाथ नगरपालिका ५ महेन्द्रनगरस्थित ऐतिहासिक दुधमती पोखरी -सरोवर-मा आकर्षक आरती घाट निर्माण हुने भएको छ ।
दुधमती नदीको उद्गमस्थलका रूपमा धार्मिक तथा ऐतिहासिक महत्व बोकेको पोखरीलाई व्यवस्थित गर्दै धार्मिक पर्यटनको केन्द्रका रूपमा विकास गर्ने उद्देश्यले आरती घाटको अवधारणा अघि सारिएको हो ।
प्रस्तावित आरती घाटमा पूजाआराधना तथा आरतीका लागि संरचना, भक्तजन बस्ने स्थान र पोखरीको सौन्दर्यीकरणसहितका संरचना रहने डिजाइनमा देखाइएको छ ।
पोखरीको जलक्षेत्र, हरियाली र धार्मिक वातावरणलाई आकर्षक बनाउने गरी घाटको स्वरूप तयार पारिएको छ । आरती घाट निर्माणपछि दुधमती पोखरीको धार्मिक महत्व थप उजागर हुनुका साथै स्थानीय पर्यटन प्रवद्र्धनमा समेत टेवा पुग्ने अपेक्षा गरिएको छ ।
