काठमाडौं, १९ भदौ । रसुवाको भोटेकोशी नदीमा आएको विनाशकारी बाढीमा ज्यान गुमाएका सुरक्षाकर्मीका परिवारलाई राहत तथा सहायता उपलब्ध गराउने निर्णय सम्बन्धित सुरक्षा निकायले गरेका छन्।
बाढीमा नेपाली सेनाका ४५, नेपाल प्रहरीका २५ र सशस्त्र प्रहरीका १४ गरी ८४ जना सुरक्षाकर्मी सम्पर्कविहीन भएका छन्।
सशस्त्र प्रहरीले मृतक कर्मचारीका आश्रित परिवारलाई तत्काल २५ लाख रुपैयाँ राहत, कल्याण कोषको ऋण मिनाहा, सन्तानलाई कक्षा १० सम्म निःशुल्क शिक्षा, एक सदस्यलाई सीपमूलक तालिम तथा उपयुक्त स्थानमा स्मारक निर्माण गर्ने निर्णय गरेको छ। बाढीबाट जोगिएका पाँच कर्मचारीलाई जनही ५० हजार रुपैयाँ प्रोत्साहन दिइनेछ।
नेपाल प्रहरीले पनि मृतक प्रहरी कर्मचारीका परिवारलाई नियमअनुसारको सुविधाबाहेक १० लाख रुपैयाँ राहत, कल्याण कोषको विशेष सापटी मिनाहा, एक सदस्यलाई सीपमूलक तालिम तथा सन्ततिलाई प्रहरी स्कुलमा निःशुल्क अध्ययनको व्यवस्था गर्ने जनाएको छ।
यसैगरी, सशस्त्र प्रहरीका कर्मचारीको ३ देखि १५ दिनसम्मको तलब योगदानबाट प्रधानमन्त्री दैवी प्रकोप उद्धार कोषमा १५ करोड ५० लाख रुपैयाँ जम्मा गरिने भएको छ।
सरकारले खोज तथा उद्धारमा खटिएका सुरक्षाकर्मी तथा राष्ट्रसेवकलाई जोखिम भत्ता, खाजा खर्च, घाइतेलाई निःशुल्क उपचार र उद्धारका क्रममा मृत्यु भएमा परिवारलाई १० लाख रुपैयाँ राहत दिने निर्णय गरेको छ। नेपाली सेनाले भने आफ्ना कर्मचारीसम्बन्धी राहतबारे निर्णय गर्न बाँकी रहेको छ।
