काठमाडौं, १८ भदौ । भोटेकोसीमा आएको विनाशकारी बाढीमा परी मृत्यु भएका तथा पहिचान खुल्न नसकेका ८९७ शवलाई प्रहरीले हालसम्म जमिनमा व्यवस्थापन गरेको छ।
नेपाल प्रहरीका प्रवक्ता डीआईजी अविनारायण काफ्लेका अनुसार पहिचान हुन नसकेका शवलाई डीएनए परीक्षणमार्फत पछि आफन्तको जिम्मा लगाउने गरी अस्थायी रूपमा जमिनमुनि राखिएको हो।
प्रहरीका अनुसार हालसम्म बाढी प्रभावित क्षेत्रबाट १ हजार २५२ शव फेला परेका छन्। तीमध्ये ९५ जनाको मात्र पहिचान खुलेको छ। पहिचान भएका शव आफन्तलाई बुझाइसकिएको प्रहरीले जनाएको छ। बाँकी शवको पहिचानका लागि प्रहरी अस्पताल तथा सम्बन्धित जिल्ला प्रहरी कार्यालयबाट डीएनए नमुना संकलन भइरहेको छ।
जमिनमा व्यवस्थापन गरिएका शवमध्ये २१३ महिला र ३१४ पुरुषका छन् भने ३७० शवको लिंगसमेत पहिचान हुन सकेको छैन। पहिचान नखुलेका ९६० शवको विवरण प्रहरीले आफ्नो वेबसाइटमा सार्वजनिक गरेको छ।
भदौ १० गतेको बाढीपछि अझै ४ हजार ८७५ जना सम्पर्कविहीन रहेको र उनीहरूको खोजी जारी रहेको डीआईजी काफ्लेले बताए। खोज, उद्धार, राहत तथा शव व्यवस्थापनका लागि ७ हजार ९१२ प्रहरी परिचालन गरिएको छ। उद्धार गरिएका ३ हजार १०३ जनालाई होल्डिङ सेन्टरमा राखिएको छ।
प्रहरीका अनुसार रसुवामा १२७, नुवाकोटमा १७७, धादिङमा ६०, चितवनमा ३५५, गोरखामा ६९, तनहुँमा ३८, नवलपरासी पूर्वमा २१८ र नवलपरासी पश्चिममा १९० शव फेला परेका छन्। भारतमा फेला परेका १८ शवसमेत नवलपरासी पश्चिममा बुझाइएको प्रहरीले जनाएको छ।
