काठमाडौं, १८ भदौ । सत्तारुढ राष्ट्रिय स्वतन्त्र पार्टी (रास्वपा) का सांसद मनिष झाले नेपालमा बाढीबाट भएको क्षतिको क्षतिपूर्ति अन्तर्राष्ट्रिय समुदायबाट माग गर्नुपर्ने बताएका छन्।
बिहीबार प्रतिनिधिसभा बैठकमा बोल्दै झाले जलवायु परिवर्तन र कार्बन उत्सर्जनमा विकसित राष्ट्रहरूको ठूलो योगदान रहेको भन्दै नेपालले राहतभन्दा क्षतिपूर्तिको माग गर्नुपर्ने धारणा राखे। उनले आफ्नो सम्बोधनको केही अंश अंग्रेजीमा प्रस्तुत गर्दै अन्तर्राष्ट्रिय समुदायको ध्यानाकर्षण गराएका थिए।
नेपालको कार्बन उत्सर्जन हिस्सा निकै न्यून भए पनि अमेरिका, चीन र भारतजस्ता ठूला राष्ट्रबाट ठूलो मात्रामा कार्बन उत्सर्जन भइरहेको उनको भनाइ थियो। त्यसकै कारण जलवायु परिवर्तन तीव्र बनेर नेपालजस्ता मुलुकले प्राकृतिक विपद्को ठूलो क्षति व्यहोर्नुपरेको उनले बताए।
झाले बाढीबाट भएको क्षतिपूर्तिका लागि सबै राजनीतिक दल एकजुट भएर अन्तर्राष्ट्रिय समुदायसमक्ष आवाज उठाउनुपर्नेमा जोड दिए। साथै प्रधानमन्त्री बालेन्द्र शाहलाई संयुक्त राष्ट्रसंघलगायत अन्तर्राष्ट्रिय मञ्चमा नेपालको क्षतिपूर्तिको मागलाई प्राथमिकताका साथ उठाउन आग्रह गरे।
