काठमाडौं, १५ भदौ । बाढी प्रभावितको उद्धार, राहत र पुनःस्थापनाका लागि सरकारले सञ्चालन गरेको प्रधानमन्त्री दैवी प्रकोप कोषमा हालसम्म रु ५ अर्ब २४ करोड ६९ लाख ४४ हजार जम्मा भएको छ।
प्रधानमन्त्री तथा मन्त्रिपरिषद्को कार्यालयका अनुसार स्वदेश तथा विदेशबाट कोषमा सहयोग आउने क्रम जारी छ। सहयोगको विवरण ‘उद्धार अनुरोध पोर्टल’ मार्फत सार्वजनिक गरिएको छ।
नौ वाणिज्य बैंकका खाताबाट रकम संकलन भएको र हिमालयन बैंक तथा लक्ष्मी बैंकमा थप २१ लाख ४३ हजार २३२ अमेरिकी डलर जम्मा भएको कार्यालयले जनाएको छ।
सरकारले आर्थिक ठगीबाट जोगिन आधिकारिक क्यूआर कोड तथा ‘प्रधानमन्त्री दैवी प्रकोप कोष’ र ‘प्रधानमन्त्री कोष’का खातामा मात्र सहयोग रकम जम्मा गर्न आग्रह गरेको छ।
