काठमाडौं, १६ साउन । जनकपुरमा साउन १४ गते दुई समुदायबीच भएको आन्दोलनका क्रममा गम्भीर घाइते भएका १२ वर्षीय आनन्द कुमार दासको काठमाडौंस्थित ट्रमा सेन्टरमा टाउकोको सफल शल्यक्रिया गरिएको छ ।
चिकित्सकका अनुसार शल्यक्रिया सफल भए पनि उनको अवस्था अझै संवेदनशील रहेकाले आईसीयूमा राखेर उपचार भइरहेको छ । आगामी ४८ घण्टासम्म विशेष निगरानी -अब्जर्भेसन) मा राखी स्वास्थ्य अवस्थाको निरन्तर मूल्याङ्कन गरिने अस्पताल स्रोतले जनाएको छ ।
आन्दोलनका क्रममा गम्भीर चोट लागेपछि आनन्दलाई थप उपचारका लागि सेनाको हेलिकप्टरकाट जनकपुरबाट काठमाडौं ल्याइएको थियो । हाल विशेषज्ञ चिकित्सकको टोलीले उनको उपचार गरिरहेको छ ।
यता, पीडित परिवारले सरकारले बालकको सम्पूर्ण उपचार खर्च व्यहोर्नुका साथै उचित क्षतिपूर्ति उपलब्ध गराउन माग गरेको छ । आन्दोलनका क्रममा निर्दोष बालक गम्भीर घाइते भएको भन्दै परिवारले उपचारसँगै आर्थिक राहत, पुनःस्थापना तथा न्याय सुनिश्चित गर्न सरकारसँग आग्रह गरेको हो ।
परिवारले घटनाको निष्पक्ष छानबिन गरी दोषीमाथि कानुनी कारबाही गर्न तथा घाइते बालकको भविष्यलाई ध्यानमा राखेर उचित क्षतिपूर्ति उपलब्ध गराउन सरकारसँग माग गरेको छ ।
आनन्द दास आईसीयूमा, चिकित्सकले ४८ घण्टा विशेष निगरानीमा राख्ने
