काठमाडौं, १५ साउन। जनकपुरमा हिजो भएको आन्दोलनका क्रममा गम्भीर घाइते भएका १२ वर्षीय आनन्द कुमार दासको काठमाडौंस्थित ट्रमा सेन्टरमा सफलतापूर्वक शल्यक्रिया (अपरेशन) सम्पन्न भएको छ। चिकित्सकहरूका अनुसार अपरेशन सफल भए पनि उनको स्वास्थ्य अवस्थालाई ध्यानमा राख्दै हाल आईसीयूमा राखेर उपचार भइरहेको छ। डाक्टरहरूको सल्लाहअनुसार आगामी ४८ घण्टासम्म विशेष निगरानी (अब्जर्भेसन) मा राखिनेछ। यस अवधिमा उनको स्वास्थ्य अवस्थाको निरन्तर मूल्याङ्कन गरिने अस्पताल स्रोतले जनाएको छ। आन्दोलनका क्रममा घाइते भएका आनन्दलाई थप उपचारका लागि काठमाडौं ल्याइएको थियो।
सफल शल्यक्रियापछि परिवारका सदस्य तथा शुभेच्छुकहरूले राहत महसुस गरेका छन्। यसैबीच, विभिन्न क्षेत्रका व्यक्तित्व तथा सर्वसाधारणले आनन्दको शीघ्र स्वास्थ्यलाभको कामना गर्दै सामाजिक सञ्जालमार्फत शुभेच्छा व्यक्त गरिरहेका छन्।
माता जानकीको आशीर्वादले उनी चाँडै पूर्ण रूपमा स्वस्थ भएर आफ्ना परिवार तथा जनकपुरवासीबीच फर्किन सकून् भन्ने कामना गरिएको छ।
