सुनसरी, १५ साउन। सुनसरीको देवानगञ्ज गाउँपालिका–३, कप्तानगञ्जमा भएको गोलीकाण्डपछि सरकार र पीडित परिवारबीच सहमति जुटेको छ। शुक्रबार बिहान भएको लिखित सम्झौतासँगै घटनापछि जारी आन्दोलनका कार्यक्रम स्थगित भएका छन्।
बिहीबार रातिदेखि चलेको लामो वार्तापछि शुक्रबार बिहान करिब ५ बजे ७ बुँदे सहमतिमा हस्ताक्षर भएको हो। सरकारका तर्फबाट गृहमन्त्री सुधन गुरुङ र पीडित परिवारका तर्फबाट मृतक ओमप्रकाश मेहताका अभिभावक कुशदेव मेहता तथा जयप्रकाश मेहताका अभिभावक नरेश मेहताले सम्झौतापत्रमा हस्ताक्षर गरेका हुन्।
सहमतिअनुसार सरकारले गोलीकाण्डमा ज्यान गुमाएका ओमप्रकाश मेहता र जयप्रकाश मेहतालाई शहीद घोषणा गर्ने प्रक्रिया तत्काल सुरु गर्ने प्रतिबद्धता जनाएको छ। दुवै मृतकका परिवारलाई जनही १० लाख रुपैयाँ आर्थिक राहत उपलब्ध गराइनेछ भने प्रत्येक परिवारका एक जना योग्य सदस्यलाई सरकारी मापदण्डअनुसार रोजगारीको व्यवस्था गरिनेछ।
सम्झौतापछि अस्पतालमा रहेका दुवै मृतकको शव परिवारलाई बुझाइने भएको छ। परिवारका अनुसार उनीहरूको अन्त्येष्टि आज दिउँसो २ बजे गरिने तयारी छ।
घटनापछि विभिन्न माग राख्दै आन्दोलनमा उत्रिएको पीडित पक्षले सहमति भएसँगै आफ्ना सबै आन्दोलनका कार्यक्रम तत्कालका लागि स्थगित गरेको जनाएको छ। सरकारले सहमतिका बुँदाहरू कार्यान्वयन गर्ने प्रतिबद्धता जनाएपछि दुवै पक्षबीच विवाद समाधानको बाटो खुलेको बताइएको छ।
