काठमाडौं, ७ साउन । आईसीसी पुरुष क्रिकेट विश्वकप लिग–२ अन्तर्गत त्रिकोणात्मक सिरिजको दोस्रो खेलमा नेपालले आज आयोजक नेदरल्यान्ड्ससँग प्रतिस्पर्धा गर्दैछ। नेदरल्यान्ड्सको युट्रेचस्थित स्पोर्ट्सपार्क मार्सचल्करविर्ड मैदानमा हुने खेल नेपाली समयअनुसार दिउँसो २:४५ बजे सुरु हुनेछ।
नामिबियाविरुद्ध पहिलो खेलमा ८ विकेटको पराजय बेहोरेको नेपाल आजको खेल जित्दै सिरिजमा पुनरागमन गर्ने लक्ष्यमा छ। प्रशिक्षक र खेलाडीहरू पनि पहिलो खेलको कमजोरी सुधार गर्दै सशक्त प्रदर्शन गर्ने तयारीमा छन्।
हाल विश्वकप लिग–२ को अंकतालिकामा नेपाल २८ खेलबाट २४ अंकसहित पाँचौँ स्थानमा छ। समान खेलबाट ३२ अंक जोडेको नेदरल्यान्ड्स तेस्रो स्थानमा रहँदा, २४ अंक भए पनि नेट रनरेटका आधारमा नामिबिया सातौँ स्थानमा छ।
नेपालले यस भ्रमणमा साउन ११ गते पुनः नामिबिया र साउन १३ गते फेरि नेदरल्यान्ड्ससँग प्रतिस्पर्धा गर्ने तालिका छ।
अंकतालिकामा अमेरिका ३२ खेलबाट ४३ अंकसहित शीर्ष स्थानमा छ भने स्कटल्यान्ड ३८ अंकसहित दोस्रो स्थानमा रहेको छ। ओमान ३१ अंकसहित चौथो, क्यानडा २४ अंकसहित छैटौँ तथा यूएई २४ खेलबाट १४ अंकसहित पुछारमा रहेको छ।
नेपालका लागि बाँकी सबै खेल अत्यन्त महत्वपूर्ण छन्। विश्वकप ग्लोबल क्वालिफायरमा सिधै स्थान बनाउन शीर्ष चारभित्र रहनुपर्ने भएकाले नेपाललाई अबका अधिकांश खेल जित्नै पर्ने दबाब छ। यद्यपि, एकदिवसीय अन्तर्राष्ट्रिय (ओडीआई) मान्यता जोगाउन भने शीर्ष ६ भित्र स्थान सुरक्षित गरे पुग्ने व्यवस्था रहेको छ।
