जनकपुर, ३१ जेठ । केही महिनाअघि मधेश प्रदेश सरकारका गृह, सञ्चार तथा कानुन मन्त्री फकिरा महतोको अगुवाइमा जनकपुरधामका विभिन्न चौक तथा फुटपाथमा अवैध रूपमा निर्माण गरिएका टहरा र पसल हटाउने अभियान सञ्चालन गरिएको थियो ।
त्यसबेला विशेष गरी पेठ्ठीया बजार क्षेत्रमा सडक अतिक्रमण गरी सञ्चालन गरिएका पसलहरू हटाइएपछि बजार व्यवस्थापनमा सुधार आउने अपेक्षा गरिएको थियो ।
तर अभियान सञ्चालन भएको केही महिनामै पेठ्ठीया बजारको अवस्था फेरि पुरानै अवस्थामा फर्किएको स्थानीयवासीको गुनासो छ । बजार क्षेत्रमा पुनः सडक किनार र फुटपाथमा पसल थाप्ने क्रम बढेको छ भने सवारी आवागमन तथा पैदल यात्रुलाई समेत आवतजावत गर्न कठिन हुने गरी भीडभाड देखिन थालेको छ ।
स्थानीयका अनुसार अहिले पेठ्ठीया बजारमा पहिलेभन्दा पनि बढी भीडभाड हुन थालेको छ । व्यवसायीहरूले सडकमै सामान राखेर व्यापार सञ्चालन गर्दा बजार क्षेत्र अस्तव्यस्त बन्दै गएको छ । यसले ट्राफिक व्यवस्थापनमा समस्या उत्पन्न गर्नुका साथै दुर्घटनाको जोखिमसमेत बढाएको उनीहरूको भनाइ छ ।
अभियानका क्रममा खाली गराइएका स्थानमा पुनः अतिक्रमण हुन थाले पनि सम्बन्धित निकायले प्रभावकारी अनुगमन गर्न नसकेको आरोप लागिरहेको छ ।
जनकपुरधाम उपमहानगरपालिकाले बजार व्यवस्थापन र सडक अतिक्रमण नियन्त्रणमा आवश्यक चासो नदिएको भन्दै स्थानीयले असन्तुष्टि व्यक्त गरेका छन् ।
स्थानीयवासीले बजारलाई व्यवस्थित बनाउन एकपटकको अभियान मात्र पर्याप्त नहुने भन्दै नियमित अनुगमन, कडाइका साथ कार्यान्वयन र दीर्घकालीन व्यवस्थापन योजना आवश्यक रहेको बताएका छन् ।
